Sepolesa sa Lesotho se tlalehile hore mosali oa Mosotho ea sa leng mocha lilemong, o falalitsoe M10,000 kamor’a ho ekoa ka ho tšepisoa ho ba ‘toloko’ le ho rekisoa phofshoana ea lefofo ea lipere tsa reisisi.

Ho ea ka motlatsi oa mookameli ofising ea Thibelo ea Boqhekanyetsi ba Lichelete (Financial Crime Counter Unit) ntlokholo ea sepolesa Maseru, Sub Inspector Pholoana Kikine, sechaba se lokela ho hlokomela boqhekanyetsi le bomenemene tse ntseng li ja setsi matsatsing ana.

Sub Inspector Kikine o itse ho kene litlaleho ofising ea habo moo ho nang le seboko sa phohomela ka boqhekanyetsi bo etsetsoang karolo e ‘ngoe ea sechaba. O itse matsatsing ana, mosali oa Mosotho, 33, ea lulang Khubetsoana, Maseru, o ile a eloa ka liphalana ke bakhosheli ba banna ba nto ikela ka matsebetsebe a M10,000, lehoja ba ne ba batlile M20,000, ea mpa ea eba hore mosali ha na eona.

O itse qaleho ea taba ke hore mosali o ile la fumana mohala oa motho oa monna ea neng a utloahala a mo tseba; a bile a tseba hore ke letsoalloa la hokae, ‘me a nyaloa hokae. O itse mong’a mohala ona o ne a hloka thuso ea mosali enoa hore a mpe a mo thuse ka ho thusa monna e mong, eo eena mokopi a tla mo kopanya le mosali enoa, kaha monna eo a sa tsebe senyesemane joale a lokela ho tla kopana le makhooa ho tla buisana le ‘ona ka litaba tsa khoebo ea ho lema matekoane le ho tla tekena tumellano ea mokhoa oa tšebetso; e leng hore mosali o ne a kupuoa ho ba toloko.

Tlhaloso e tsoetsepele hore ba ile ba fela ba kopanela Maseru, ka setopong sa libese. Ho utloahala ha mosali a ne a tsamaea ka koloi ea hae, ‘me monna eo (oa mohlophisi oa kopano ena ea khoebo) o ile a kopa ho kena koloing ka le reng, eo mphat’oae ea kopang thuso, o sebakeng se seng haufi le Pioneer Mall. O itse ba ile ba fela ba leba teng.

Sub Inspector Kikine o itse ha ba le moo, ke ha mohala o kena ho monna enoa oa mohlophisi o reng ba kopane haufinyane le Maseru Club. O itse ba fetse ba ile moo, ’me ha ba fihla ba fumana monna e mong moo a eme a le mong. Tlaleho e tsoelapele hore mosali o ile a makala ha ba fihla moo a utloa monna eo a ntseng a tsamaea le eena, a halefela eo motsoalle oa hae ka le reng o hloloa ho boloka nako kaha makhooa le liakhente li boloka nako, joale eena o liehile ‘me ekanna eaba bao ba se ba bile ba tsamaile; empa leha holejoalo o ile a re ba eme hanyane mohlomong ba tla khutla.

Sub Insp. Kikine o itse ba ile ba fela ba ema nakoana. O itse ka nako e sa feliseng pelo ba eme, monna ea tlo thusoa ho tolokelloa sekhooa, o ile a hlahisa phofshoana e tšetsoeng kahar’a polasetiki, a bontša ‘mphat’oae a bile a hlalosa bohlokoa ba eona ka le reng e fuoa lipere tsa reisisi, ‘me e li fa matla. O itse eo monga phofshoana o ile a hlalosa hore o rata ho kena khoebong eo ea reisisi hobane e chelete e ngata, ‘me haeba mosali a ka khahloa, a ka mo khoaela ka lehafing, ‘me ba etsa chelete e ngata!