Morena Abiel Kotsoro Tšese (32) oa Ha Kotsoro Semonkong, Molekoli Ralethoko (42) oa Qoaling le Thabelo Chatsane (29) oa Likolobeng, Makhaleng ba hlahile ha khutšoanyane lekhotleng la ’Maseterata Berea ka ’Mantaha oa La 12 Loetse Monongoaha, ka pelaello ea bosholu ba likhomo tse tharo tse utsoitsoeng Makhaleng, Ha Mojela, ’me tsa fumanoa Sekamaneng, Berea.
sesotho
Sept. 15, 2022
KA THABANG MOHLOKI
3 min read
Setempe se ba kenya toronkong
LABORARO LA LI 14 LOETSE, 2022
Story highlights
Sepolesa se ile sa fumana monyenyetsi oa hore ho na le likhomo tse ntseng li rekisetsoa selakheng sa mohoebi e mong Sekamaneng.
Sepolesa se ile sa tšoara banna ba bararo ho kenyeletsa le morena ha e mong a iphile limenyane, ka pelaello ea bosholu ba likhomo.
Mookameli ofising ea thibelo ea Bosholu ba Liphoofolo motebong oa sepolesa sa Ha Mabote Inspector Maphau Makhakhe o bontšitse ha sepolesa sa habo, se ile sa tšoara banna ba bararo ho kenyeletsa le morena ha e mong a iphile limenyane ka La Supa, Loetse Selemong se holimo, ka pelaello ea bosholu ba likhomo.
Ha a nama ka litaba tsena, o itse sepolesa se ile sa fumana monyenyetsi oa hore ho na le likhomo tse ntseng li rekisetsoa selakheng sa mohoebi e mong Sekamaneng; ‘me hang hang ba ile ba tlola matjato a masesane ho leba sebakeng seo.
A re ho fihleng ha bona ba ile ba fumana likhomo tse tharo, tseo mohoebi a hlalositseng a li rekiselitsoe ke Molekoli Ralethoko. O itse tlhaloso ea monga selakha, e bile hore litokomane tsa likhomo tseo, li nkiloe ke litho tsa sesole kaha li ile tsa fihla pejana ho mapolesa.
Insp. Makhakhe o itse letsatsi le hlahlamang, ba ile ba fumana litokomane ‘me ba ba le pelaelo e kholo ha ba elelloa hore ke litlakana-tšooana ha se babeisi kaha liphoofolo li rekisoa ka babeisi. A re litlakana-tšooana tseo, li ne li otluoe ka setempe sa Ha Kotsoro, Semonkong. Kemoo a supileng hore ba ile ba thakhola liphuputso ho batlana le mong’a liphoofolo tseo tse rekisoang ka litlakana-tšooana.
A re lipatlisisong tsa bona, Ralethoko o ile a tiisa hore o rekile likhomo tseo kaha litokomane li teng tse pakang matšoao le mebala ea likhomo. “Re ile ra re a re fe mabitso a motho eo a rekang likhomo ho eena, re tsebe ho ea hlahloba buka ea hae ea liphoofolo”, ke Insp Makhakhe eo. A tsoelapele hore ba ile ba bona se khitla lejoe.
Enjoy our daily newsletter from today
Access exclusive newsletters, along with previews of new media releases.
“Ha a se a bona hore re lomme bebebe, ke ha a tsoa pooneng a hlalosa hore likhomo ba li utsoitse, Ha Mojela, Makhaleng li le ’Ne, e ‘ngoe ea khathala tseleng ha ba le Pheuoeng, Nyakosoba ‘me ba lokela ho e siea teng,” ho rialo Insp. Makhakhe.
A re Ralethoko o ile a hlalosa ha ba utsoitse likhomo tseo ba le bararo ’moho le Thabelo Chatsane le e mong ea ntseng a le palehong. A re Thabelo ba mo fumane malaeneng Lithabaneng, haufi le Ha Motšoeneng, pel’a Temong; moo ho utloahalang ha mong’a matlo a ne a sa tsebe hore ntlo ea hae, e na le motho ea lulang, ea nang le nako ea likhoeli tse tharo.
A re liphuputso li ile tsa ba lebisa ho morena Tšese ‘me a tšoaroa. “Se re makalitseng ke hore morena Tšese o otlela babelaelloa bana ka setempe lipampiring tse sa ngoloang letho, hore ha ba qeta ho utsoa liphoofolo, ba ngole matšoao le mebala,” ho rialo Insp Makhakhe.
O itse sepolesa se fumane hore morena o lefshoa chelete fela eo ba ka mo lebohang ka eona, kaha ha e lekane; ka nako e ‘ngoe e ba sekete sa Maloti kapa ka tlasana. Insp Makhakhe a re ba fumane hore morena o ile a tloha Ha Kotsoro ka setempe ho tla Maseru ka toropong ho tla tlapisetsa babelaelloa bao lipampiri.
O menyelelitse maritsa ka ho ipiletsa ho bo-ralilakha le bohle ba rekang liphoofolo hore ba ele hloko hore liphoofolo li rekisoa ka babeisi eseng ka li tlakana-tšooana. A eletsa marena ho itekola kaha e le oona mapolesa a pele metseng ea bona. A re e ke e be marena, ba khaotse ho hlahella liketsong tsa bosholu kaha li ba theola seriti. Ba tla boela ba hlaha hape khotla ka La 22 Loetse Monongoaha.
Tailored for you
